మహేశ్‌బాబు సినిమా పేరు ఇదేనా? తెరపైకి కొత్త టైటిల్!

ప్రముఖ దర్శకుడు ఏఆర్ మురుగదాస్, ప్రిన్స్ మహేశ్‌బాబు కలయికలో వస్తున్న చిత్రానికి సంబంధించిన టైటిల్ మరొకటి తాజాగా తెరపైకి వచ్చింది. గతంలో ఈ చిత్రానికి సంభవామి యుగే యుగే, అభిమన్యు, ఏజెంట్ శివ, మర్మం పేర్లు వెలుగులోకి వచ్చాయి.

తాజాగా ఈ చిత్రానికి స్పైడర్ అనే పేరు దాదాపు ఖరారు చేసినట్టు సోషల్ మీడియాలో ప్రచారం జరుగుతున్నది. దానికి సంబంధించిన పోస్టర్ కూడా డిజైన్ చేశారు. అయితే ఆ పోస్టర్ చిత్ర నిర్వాహకులు చేశారా లేక ఫ్యాన్ మేడ్ పోస్టర్ అనే విషయంపై క్లారిటీ లేదు

ఈ చిత్రానికి సంబంధించిన షూటింగ్ మార్చి 22వ తేదీ నుంచి వియత్నాంలో చేయనున్నట్టు సమాచారం. వియత్నాంకు వెళ్లడానికి ముందు చెన్నైలో మార్చి 11 నుంచి చిన్న షెడ్యూల్ ఒకటి ప్లాన్ చేసినట్టు తెలుస్తున్నది. ఇటీవల హైదరాబాద్‌లోని అన్నపూర్ణ స్టూడియోలో ఓ షెడ్యూల్‌ను కంప్లీట్ చేశారు.

ప్రతిష్ఠాత్మకంగా రూపొందుతున్న ఈ చిత్రంలో మహేశ్ బాబు ఇంటెలిజెన్స్ ఆఫీసర్‌గా నటిస్తున్నారు. ఈ చిత్రంలో భరత్ ఓ ప్రధాన పాత్ర పోషిస్తున్నాడు. ఈ చిత్రం ద్వారా ప్రముఖ కెమెరామెన్, దర్శకుడు సంతోష్ శివన్ తొలిసారి తెలుగులోకి ప్రవేశిస్తున్నారు. తుపాకి చిత్రం తర్వాత ఏఆర్ మురుగదాస్‌తో సంతోష్ శివన్ చేస్తున్న రెండో సినిమా ఇది. ఎడిటర్‌గా శ్రీకర్ ప్రసాద్ బాధ్యతలను నిర్వహిస్తున్నారు.